Señol jues, pasi usté más alanti
y que entrin tos esos,
no le dé a usté ansia
no le dé a usté mieo…
Si venís antiayel a afligila
sos tumbo a la puerta. ¡Pero ya s’ha muerto!
¡Embargal, embargal los avíos,
que aquí no hay dinero:
lo he gastao en comías pa ella
y en boticas que no le sirvieron;
y eso que me quea,
porque no me dio tiempo a vendello,
ya me está sobrando,
ya me está gediendo!
Embargal esi sacho de pico,
y esas jocis clavás en el techo,
y esa segureja
y ese cacho e liendro…
¡Jerramientas, que no quedi una!
¿Ya pa qué las quiero?
Si tuviá que ganalo pa ella,
¡cualisquiá me quitaba a mí eso!
Pero ya no quio vel esi sacho,
ni esas jocis clavás en el techo,
ni esa segureja
ni ese cacho e liendro…
¡Pero a vel, señol jues: cuidaíto
si alguno de ésos
es osao de tocali a esa cama
ondi ella s’ha muerto:
la camita ondi yo la he querío
cuando dambos estábamos güenos;
la camita ondi yo la he cuidiau,
la camita ondi estuvo su cuerpo
cuatro mesis vivo
y una nochi muerto!
¡Señol jues: que nenguno sea osao
de tocali a esa cama ni un pelo,
porque aquí lo jinco
delanti usté mesmo!
Lleváisoslo todu,
todu, menus eso,
que esas mantas tienin
suol de su cuerpo…
¡y me güelin, me güelin a ella
ca ves que las güelo!…
José María Gabriel y Galán, Extremeñas, 1902.
Autor del audio: Desconocido
Si alguien es propietario de los derechos, por favor, comuníquelo para ser citado.
![](https://lenguayliteratura.es/wp-content/uploads/2023/06/alianza-y-condena-e1687251636280-300x181.jpeg)
Claudio Rodríguez. El baile de las Águedas.
![](https://lenguayliteratura.es/wp-content/uploads/2023/06/Aleixandre-e1687162841598-300x223.jpeg)
Vicente Aleixandre. El niño murió (nana en la selva)
![Rafael Alberti](https://lenguayliteratura.es/wp-content/uploads/2022/03/RafaelAlberti01-186x300.jpeg)
Rafael Alberti. A Claudio de la Torre
![](https://lenguayliteratura.es/wp-content/uploads/2023/06/Juana_de_Ibarbourou_from_Estampas_de_la_Biblia-e1687254738887-300x182.jpg)
Juana de Ibarbourou. La pequeña llama
![](https://lenguayliteratura.es/wp-content/uploads/2023/07/Claudio-Rodriguez-e1688747280441-300x166.jpg)
Claudio Rodríguez. Alto jornal
![](https://lenguayliteratura.es/wp-content/uploads/2023/06/Canciller_Popolizio_y_Luis_Garcia_Montero_director_del_Instituto_Cervantes_firman_acuerdo_para_la_realizacion_del_IX_Congreso_de_la_Lengua_Espanola_en_Arequipa_el_2022_cropped-e1687177130864-300x193.jpg)